بكي الرجال شين لو تعرفي

واش ينسّيني فيك يا ولفي *** وانا ما نـنسى غي باه نـفّكر فيك


عّفّي على هالمجنون عفّي *** ما تحمّلت عذابه غي باه نرضيك


وفيت لحـّبّك وانتِ تشـوفي *** هذه مدّة سنين ما عرفت نخطيك


والوحش جيّاش زايد لهفي *** صب النّار عالكـبده الله لا يورّيك


من قال مجامرالعشق تدفّي *** وانا راه جــليد حــضني بـلا بيك


واش ينســّيني فيك ويـعفي *** قلبي من هـباله راه جـنّني عليك


بكي الرجال شين لو تعرفي ***غـــدّاره دمـعته وهـو يـتبسم ليك


يبلع الكيّه و في قـلبه يخفي ***طعــنات الفـرقه بالصّح ما ياذيك


اقصفي كان اناحلالك قصفي ***حرق بنارك ولا تقـوليلي نـخلّيك


حي انا وبلا حبّك انا متوفّي ***منين نــعيش وروحي بين ايـديك


واش ينســيني فيك يا ولفي ***راه القلب عصى ما بــغى يعاديك


انا لّلي طـيته ليك على كفّي ***قلب ابــيض في الحـين تعلق بيك


وعاد في صفّك مش فصفّي ***منين يدق الحزن بابي يهرب ليك


ومللّي غبتي كـثرو مخاوفي *** لَنمـُوت وما تـجي عـينيا فعينيك


بكــّاني لدغ الـنّار في جوفي ***والقلب تحت العــذاب راه يناديك


مثل الطير قابع فوق عـرفي ***نرجى الرحـّاله يدّو خــباري ليك


وحـشك جيّفني وسلخ كـتفي ***ولاحني في الغربه ما نسمع بيك


يا ولفي قـولي لدمعتي كـفّي ***وحـنّي على قلب مـا ســامح فيك


قالولي كلام المعشوق يشفي***غي كـلّمني يا ولـفي الله يهديك